تاج من مملكه اختى الحبيبه

سلام عليكم ورحمه الله وبركاته

جالى تاج من القريبه لقلبى امنيه(مونى) صاحبه مدونه نويت اكوم مستقبلى
بسم الله الرحمن
.
.
أنت مين؟
انا امه الله اسماء

ايه يا مونى مش عارفه بعتلى لمين

.
.
مين اكتر 6 أشخاص بتحبهم ؟
مممممممممممممممممممم

بس انا بحب اشخاص كتير اوى اوى

ازاى عايزانى اقولك 6 منهم بس

اولا الرسول صلى الله عليه وسلم

ثانيا سيدنا عمر بن الخطاب

ثالثا بابا وماما واخواتى ايمن واحمد

معلش اعتبريهم واحد بقى

رابعا صحبتى الشيماء وانجى ونعيمه

خامسا القريبين لقلبى فى حاره زعتر ودول كتير اوى ومش هقول اساميهم لانهم عارفين نفسهم كويس جدا

سادسا بقى الشخص باذن الله الى هيكون زوج المستقبل وربنا كاتبه وطبعا الله اعلم بيه يعنى هو فين

باعتبار ما سيكون يعنى

.
.
هل انت سعيد؟
الحمد لله ربنا انعم عليا بنعم لا تعد ولا تحصى يمكن الواحد بيطمع او يجزع لكن فى النهايه الحمد لله

وهنا اتذكر حديث رسلو الله صلى الله عليه وسلم

عجبا لامر المؤمن امره كله خير وما كان ذلك لغير المؤمن ان اصابته سراء شكر فكان خيرا له وان اصابته ضراء صبر فكان خيرا له

صدقت يا حبيبى يا رسول الله

يارب اقدر اكون كده زى ما قلت ووصفت

.
.
هتعمل ايه لو اجتمعت مع مبارك فى مكان واحد؟
بصراحه هقوله كلمتين صابقين على نفسى اوى اوى

هقوله يعنى حضرتك بعد ما عملت كل الى عملته فى الشعب ده

ناسى انك هتقف بين ايدين ربنا بعد ما تموت

بذمتك هتقوله ايه

صدقنى وقتها مفيش لا مال ولا جاه هينفعوك

تعرف ان سيدنا عمر كان مش بينام الليل خايف ان معزه تتعثر فى الطريق فى مكان بعيد جدا من الدوله الاسلاميه وقتها

وانت بتنام وملايين بيغتصبوا وبيتسرقوا وبعتدى عليهم

بنى ادمين مش حيوانات

هقوله اتقى الله فى نفسك وكلامى ده مش علشانا

لاننا لينا ربنا اكرم منك مليون مره

لكن كلامى ده ليك انت هتعمل ايه فى حسابه

هتفضل واقف على جمر نار وهو بيسالك عن كل مليم كان معاك وصرفته

هقوله ازاى بيجيلك قلب تنام فى كل البذخ ده وعايش فيه

وفى ملايين الاسر مش لاقيه تاكل ولا لاقيه بيت يلمها

ملايين الشباب ضايع مش لاقى شغل ولا لاقى شقق يتجوز

ملايين البنات ممكن يوصل بيها الحال انها تبيع نفسها عشان تعيش

هقوله ليه بتحارب اى حد يقول ربى الله

ليه بتحارب اى حد يحاول يجمع الناس على حب ربنا وطاعته ويذكرهم بالصحابه والاخلاق والدين

لييييييييييييييييييييييييييه كل ده

صدقنى كفنك حتى لو كان من دهب

جسمك هيتحلل وهياكله الدود بردوا

وروحك هتصعد للى خلقها وتتحاسب وتتعذب

عذاب ربنا شديد وانت للاسف مش حاسس بيه

ده الجلد هيتشوى ويتبدل ويتشوى ويتبدل

حاول تقعد مع نفسك تفكر شويه

عمرك ما هتعيش ربع الى عيشته

حاول تعمل اى شئ ينفعك فى يوم لا ينفع فيه لا مال ولا بنون الا من اتى الله بقلب سليم

كل كلامى ليك مش علشان الشعب

لانى بفضل الله عارفه ان الشعب ده ليه ربنا

واحنا الى ممكن نحسن مستوانا وحالنا بنفسنا لو غيرنا انفسنا واتجمعنا على طاعه الله

لكن كلامى ليك انت

فوووووووووووووووووق بئ شويه وحاسب نفسك قبل ما تتحاسب

قبل ما تخلص الحياه الدنيا وتروح لقبر متر فى متر ويضم القبر عليك لما يكسر عظامك

ويجيلك ناكر ونكير

بجد ارجع لربنا احسن لك لانك مش هتعيش ربع الى عيشته

ربنا يهديك ويهدينا

معلش يا جماعه اصلى مؤمنه بمبدا النصيحه وده بردوا مسلم

ولا ايه رايكم

.
.
لو معايا مليون ونص جنيه اعمل ايه؟
الله ياريت

اولا هروح احج الاول وبعد لما ارجع هجيب عربيه صغيره عشان تسهلى الانتقال بين الاماكن

ثانيا بقى هعمل مشروع خيرى كبير فيه دار ايتام ودار مسنين ومركز طبى ودار تحفيظ قران ومركز يعلم الاحاديث والفقه والسنه خاصه للاطفال ومركز لتعليم الشباب الى مقبلين على الزواج ازاى يربوا اولادهم ويعنى ايه جواز

وكمان هعمل مشروع تجارى يشغل الشباب ومنه يجيب عائد ليا عشان المشروع الخيرى ده يستمر

طبعا هتقولوا لى ان الفلوس مش هتكفى

هقلكم منا الناس الى هشغلهم معايا فى المشروع عايزه تعمل للخير بردوا وهياخدوا مرتبات قليله او ممكن حتى مياخدوش

.
.
بتحب مصر؟

مش عارفه بس اكيد بحبها

يمكن لو مكنتش بحبها كان حلى بجهز نفسى للسفر

وبعدين بموت فى بحر اسكندريه وبعشقه

يبقى اكيد بحبها

بحبها لانها ملهاش ذنب فى حاجه من كل الى بشوفه

الناس هى الى خلتها بقت وحشه

.

.
انت مسلم؟
الحمد لله

.
.
ليه؟؟
والله اتولدت لاقيت نفسى مسلمه لكن بعد لما كبرت شويه عرفت اد ايه انا ربنا انعم عليا بنعمه كبيره اوى هى الاسلام

.
.
مين اكتر شخصية متقدرش تستغنى عنها؟
مش عارفه عمرى ما سالت السؤال ده لنفسى

يمكن اكتر من شخصيه

ويمكن ولا شخصيه لانى اتعلمت

احبب ما شئت فانك مفارقه

فاتعودت مهما انى ارتبطت بحد انى هفقده فى يوم من الايام

.
.
ايه اكتر موقف محرج ؟؟
مواقف كتير محرجه بتحصل للواحد

يعنى مثلا افتكر مره كنت فى الكليه فى سيكشن هيستولوجى باين وبعدين جيت اقعد على الكرسى فماخدتش بالى ان زميلتى كانت سحبته شويه لورا

قمت قعدت على الارض فطبعا اتهبدت هبده فظيعه وكل الناس اتلمت وبصيت لى وفى للاسف ناس غلسه ضحكت

فاتكسفت جدا

وفى مواقف محرجه واتكسف بردوا احكيها يعنى

كفايه الموقف ده

.
.
الامنية اللى تتمنى تحقيقها؟
اكبر امنيه عندى ان ربنا يرضى عنى

لان رضا ربنا عليا هيوصلنى لسعاده الدنيا والاخره

يارب ارضى عنا يارب
.
.
التاج باه يتمرر لمين؟

امررها لاختى طعمه فى مدونتها طعمه

وامررها كمان لرضوى فى مدونتها

لؤلؤه الزمن حبيبتى ومدونتها وحدى مع الاخرين

وامررها للرنتيسى فى مدونته رحاله

وامررها لعرفه فى مدونته غريب

امرره ل اسلام اتعلم الكمبيوتر

وكمان لجانو فى مدونته انين المذنبين وثغرات

وكمان لسيف الاسلام فى مدونته كالابووووش