السلام عليكم ورحمه الله وبركاته
****************************
اليوم ساتحدث عن ساعات قليله مضيتها فى القاهره
ربما ساعات قليله
ولكنى اكتشفت من خلالها ما قيمه بلدى الحبيبه الاسكندريه
ما اجملها بالفعل على الرغم من كل ما فيها من سلبيات وعيوب
فانا لا اقول انها جنه الله على الارض كما يفعل اخى الصغير دائما
فهذا رايه فيها
ولكننى ساقول بالفعل انها افضل ملايين المرات
ربما لاننى اعتدت على ما فيها لذا لا اقبل بالتغيير
كنت فى يوم من الايام فكرت ان انتقل للعيش بالقاهره
قاهره المعز
ولكننى اكتشفت مدى خطائى وتسرعى
قبل ان تعيش باى مكان لابد من اختباره
مع اول وهله وضعت فيها قداماى فى محطه القطار
محطه مصر
لم اتعجب
شعرت انها مثل محطه مصر عندنا فى الاسكندريه
ربما اجد الكثير من البشر يحملون اجناس مختلفه اكثر ممن اراهم فى الاسكندريه
ولكن لا ضير فى ذلك
لحظات قليله من التامل وبقول لنفسى من جوايه
ماهى زى عندنا ايه بس الفرق
ما هى الا لحظات قليله لاخرج لهذا العالم
تملكنى شعور غريب باننى فى جهنم
لا اعرف ماذا حدث
زحام فوق الوصف
درجه حراره مرتفعه فوق الوصف
ضوضاء فوق الوصف
وخاصه الكلاكسات
لايكفوووووووووووووووووون
لدرجه اننى اردت ان اصرخ فيهم كفى كلاكسات
حقيقى كلاكسات بدون اى داااااااااااااااااااااعى
ثم خطوات قليله لارى مشهد رغم ضيقى الشديد
لكنى كنت على وشك الدخول فى نوبه هيستيريه من الضحك
عشان الناس تعدى الشارع بيوقفوهم طابور
مع ان الشارع مش كبير ولا حاجه
اعتقد انى مريت بشوارع اوسع منه عندنا ومفيش الكلام ده خالص
جايز يكون صح ان الناس تمر لما الاشاره تفتح
بس يمكن متعودتش على المنظر ده نهائى
انا فى الاول افتكرتهم واقفين عشان يشتروا حاجه
او يعنى فى بياع وهما ملمومين حواليه
بس لحظات واكتشفت الماساه
طبعا زحمه رهيبه وناس كتير واقفه
اتفتحت الاشاره
هجوووووووووووووووووووووووم
طبعا بقيت بضحك من جوايا
ضحك ومختلط بضيف ونفور ورفض للمدينه بالى فيها
نيجى بقى اننا نلاقى حاجه نركبها
طبعا زحمه ومفيش
وحتى الى جاى مليان
ايه ده يعنى هركب مينى باص واقف
طبعا عادى مش دى المشكله
بس يعنى انا جايه مناسبه سعيده وشايفه انه مش مجال للبهدله
مع انى والله مفتكرش فى حياتى كلها فى اسكندريه ركبت حاجه ووقفت غير مرتين تلاته
ممكن استنى كتير بس مقفش فى المواصلات
مش تكبر بس عشان البهدله وخاصه انى فتاه يعنى
المهم اقول لوالدى طيب نركب تاكسى
طبعا قالى رقم
خلانى سكت تانى
مع انى والله مافارق معايا وكان ممكن نركب تاكسى
بس بردوا قالى انتى متخيله هتلاقى حد يوافق يروح هناك
هناك
طبعا بتسالوا مين هناك دى ولا فين هناك دى
هناك دى الى هو الحى العاشر
ده يشبه او على غرار كده برج العرب والعامريه والصحراوى عندنا
اول لما ركبنا بفضل الله
وناس ذوق جدا قاموا وقعدونا
قلت كويس عمار يا قاهريين
بس حسيت انهم مش قاهريين بصراحه
مغتربيين فى القاهره
المهم يعنى وصلت
اول لما وصلت
حسيت اد ايه اخويا بيعانى
اد ايه مراته هتعانى
ايييييييييييييييييييه ده
صحرا
صحرا
طبعا من جوايا قلت انا لو مكانها جايز ارفض
بصراحه المساله صعبه
وخاصه الى متعود وعايش فى مكان كله ناس وخدمات وبحر زى العسل
يروح للصحرا
بس طبعا اكيد لو مكانها هوافق عشان لو بحب انسان لازم اضحى والا يبقى ايه فايدتى
قعدت من جوايا اتسائل
هل الواحد يضحى بكل ده عشان الفلوس
يغترب عشان الفلوس
ماهو الشغل فى اسكندريه كان بملاليم
ميفتحش بيت
شغل القاهره يفتح
بس يفتح فى صحرا ولوحدك
بكره الغربه مع انى من عاشقى السفر
بس فى فرق بين السفر المؤقت لاسباب
وما بين الاغتراب
وهنا حزنت اوى من جوايا على الى بيحصل لكل شبابنا
طيب ده اخويا اتغرب هنا فى مصر
طيب والى بره مصر
اعرف ناس مغتربين
وسمعت حكايات وصلتنى لحد البكاء عنهم
بس هقول ايه
على راى المصريين
لقمه العيش
اكل العيش مر
ياااااااااااااااااااااااااااه هو مر لدرجه دى
تدفع سنين من عمرك وراحتك وبعدك عن اهلك واحبائك واصحابك عشانه
طبعا
الاجابه لازم تكون ايوه ادفع
امال افضل قاعد بدون عمل ولا حياه ولا استقر واتجوز
ليكم حق يا شباب
حقيقى مشفقه عليكم اوى
وفعلا مسئولياتكم كبيره
وحملكم كبير
ياريت كل البنات تحس بيكم وبلاش مغالاه فى مهر وشبكه وشقه وعفش
ياريت بجد يحسوا عشان انتو فعلا محتاجيين الى يساعدكم ويقف جنبكم
مش يزودكم ويزود حملكم
عارفين
بمناسبه القاهره والاغتراب
انا روحت الصعيد مره
المنيا تحديدا
تعرفوا
فعلا بجد المنيا افضل مليوووون مره من القاهره
بس بردوا
مازلت عاشقه لبحرك يا عروسى الجميل
يا سكندريات عاشت بداخلى
شوارعك تذكرنى باشياء لن انساها طوال حياتى
محلاتك تذكرنى باجمل الاشياء التى عشتها
ربما لحظات قليله او ساعات
ولكننى لن انساها ما حييت
اعشقك يا عروسى
6 comments:
اولا السلام عليكم
ثانيا: الله يبشرك بالخير لانى هنتقل القاهره قريب ..بس بصراحه انتى خليتنى اخاف من القاهره اكتر من الاول
انا مش بحب الزحمة ومش بحب المدن الكبيره احب الهدوء اكتر
لانى بحب امشى اتأمل فى الشوارع
انا لما كنت بعدى الشارع فى القاهره كان اللى ماشيين معايا بيزعقوا ويصراخوا لانى نادر لو بصيت على اتجاه العربيات
لانه اصلا فى بلدنا مفيش الزحمة دى لانها مدينة بسيطه فى صعيد مصر
ثالثا: فيه حاجات كتير اختفت فى القاهره وفيه حاجات كتير برضه لسه موجوده ..طبعا اقصد الاخلاقيات
يا جمال الناس الطيبه ..بس دى طيبه ولا مكر وخداع
معلهش اصلى من مدينة صغيره ودايما يخوفونا من اهل مصر
رابعا : الغربه بالنسبه للشباب اصبحت شئ لابد منه فى بلدنا علشان يقدر يعيش حياته كأنسان طبيعى وعادى زى ان انسان فى دوله محترمه
خامسا: مهما فى يوم فكرنا نسافر ..دايما بلدنا راح توحشنا وشوش الناس اللى ولفنا عليها والاماكن
فين تلاقى عم مجيد ..الشاى يا عم مجيد وهو ولا يرد عليكى ..فين تلاقى كوبرى صغنطوط على ترعة الابراهيمية وكله شباب مفيش بنات خالص انما اهو على الاقل فيه كوبرى بندردش عليه
هههههههههههه
واروح لامى الساعه اتناشر (اخرى فى السهر بره الساعه اتناشر لو دبحونى ) ألاقى امى نايمه جنب الباب مستنيه ارجع تقوليش عيل صغير وانا اللى عمرى بقى ... سنه
كام كده دلوقتى سادسا صح؟
سادسا : المنيا عروس الصعيد واجمل محافظات الصعيد والهدوء والجمال والبساطه ..يا سلام لما تمشى فى شوارع ملوى وتلاقى القضاه ماشين فى الشارع بالترنك عادى ونازلين يشتروا خضار
انا سمعت لكن ما شفتش بصراحه
لانى لو شفتهم مش هعرفهم اصلا
وكفايه كده انا اتكلمت كتير
ملحوظه : اياك تقولى اطلع بره اسكندريه تانى
التوقيع / الامير القادم ..سابقا
اسكندرية مارية وتربها زعفراني
ادعوكي لزيارة مدونتي المتواضعة http://miikha.blogspot.com/
جزاك الله خرا اخى الباحث عن الحقيقه
وبعدين حضرتك متخافش من القاهره ولا حاجه وربنا يوفق حضرتك هناك باذن الله فى عملك
بس انا عموما قلت انطباعى الاول عنها
جايز جدا لو كنت تجولت فيها كان انطباعى اختلف
بس الحقيقه الاكيده انها فعلا زحمه جدا وحر جدا
ودول حاجتين صعب عليا اتحملهم
الا اذا حكمت الظروف
وفعلا الكلام الجميل الى حضرتك قلته عن بساطه اهل الصعيد انا حسيته بنفسى هناك
ياااااااااااه اد ايه الناس كانوا طيبين هناك اوى وبسطا اوى
ولو سالت اى حد بيبقى نفسه يساعدك جدا
ده غير هدوء الشوارع هناك
فعلا المنيا جميله جدا
والاثار الى فيها والخضرا والنيل
فعلا بلد تستحق الواحد يعيش فيها
بس ارجع واقول
معشوقتى الاولى والاخيره هى اسكندريه ببحرها
لكن اوقات ظروف الحياه بتجبرك على انك تسيبها زى ما حصل مع اخويا
وبيحصل مع شباب كتير اوى
ملحوظه: مازلت اود ان اسافر ولكن ليس للقاهره
ولكن لمكان اخر ربما حلم تحققه لى الايام وربما لا
الله المستعان
جزاك الله خيرا اخى الجمعاوى الاصيل وفعلا اسكندريه دى ماريه وترابها زعفران
وباذن الله هزور مدونتك ربنا يوفقك الى ما يحب ويرضى
السلام عليكم
ازي حضرتك يا دكتورة
شفت اسمك فى زعتر افتكرت ان حضرتك طلبتى ارد وللاسف نسيت
مش عارف بقى احضر القنابل ولا بمناسبه العيد المسامح كريم
كل سنه وانتى بخير وربنا يعين حضرتك فى شغلك
عليكم السلام ورحمه الله
ازيك يا باش مهندس وائل
كل سنه وحضرتك طيب
وبالنسبه للقنابل انا مستنياها
لانى كنت احب اعرف رايك بجد فى الى قلته
وخاصه انك قاهرى
ومتقلقش ان شاء الله فى اسلحه مضاده للقنابل
جزاك الله خيرا على مرورك وانك افتكرت
وياريت تدعيلى كتير
ربنا يعزك يارب
Post a Comment