السلام عليكم ورحمه الله وبركاته
********************
التاج ده جالى من مدونه الصحيفه الكاشفه وصاحبها اخى الباحث عن الحقيقه
التاج ده جالى من مدونه الصحيفه الكاشفه وصاحبها اخى الباحث عن الحقيقه
اسم مدونتك؟
طريق الامل
او اسمها فى اللينك مملكتى
او اسمها فى اللينك مملكتى
لماذا اخترته ..وماهي نيتك من وراء اختياره؟
اولا انا اخترته يكون طريق الامل
لانى كان نفسى اوى تكون المدونه دى طريقى لتحقيق امالى
واقدر من خلالها ومن خلال الى هكتبه فيها من كلمات تكون طريق الامل للناس
مش عارفه هل هقدر اعمل كده ولالاء
واختيارى لاسمها مملكتى لانى حسيت انها ملكى لوحدى اقدر اكتب فيها الى يعجبنى
عشان كده بعتز اوى انها مملكتى
وبالوقت بقيت حاسه انها قلعه ومملكه مش اى حد يقدر يجتازها ويدخلها
بقيت فعلا حاسه انها مملكه ليا لوحدى
وفعلا المدونه حققت لى امنيتى
وبقت مملكتى الخاصه
ومفيش غير احضانها بتضمنى فى اصعب اوقاتى واصعب لحظاتى
هل فكرت في إغلاق مدونتك؟
بصراحه الفكره دى عمرها ما خطرت على بالى
حتى لو تركتها فتره نتيجه اى ظروف
سواء انشغال او اى سبب اخر
لكنى عمرى ما هقفلها فى يوم من الايام
لانها بتحمل ذكريات واحاسيس منها الحزين ومنها الفرح
ومش ممكن حد يقفل او يقتل او ينهى وجود جزء من حياته
انا بعتبرها جزء منى
مش ممكن اقفلها ابدا
صورتك في المدونة ورمزيتها؟؟
الصوره بنت صغيره بتقرا فى كتاب الله وبتدعى ربنا
طبعا ده احساسى ورغبه جوايا انى افضل طفله صغيره
وفى نفس الوقت نفسى اكون دايما بين ايدين ربنا
سواء بالدعاء او قراءه القران
عشان كده اخترتها
لماذا دخلت عالم التدوين من الاساس؟
والله السبب فى دخولى هى انسانه بحبها جدا
هى الى عرفتنى يعنى ايه مدونه
ووقتها حسيت انى عايزه يبقى لى مكان خاص بيا
عشان اكتب فيه كل خواطرى
وبعدها حسيت انى ممكن اكتب حاجات تانيه غير الخواطر
يعنى حسيت انه ممكن يكون مكان اقول من خلاله فكره للى حواليا
وحاسه ان هيجى يوم والمملكه دى يكون لها دور اكبر من كده بكتير
انا عارفه انها لازالت ملهاش اى دور
جمله قيلت لك فى وصف مدونتك؟
بصراحه اى حد قال اى كلمه حتى لو جزاك الله خيرا بعتبرها شرف لمدونتى
مجرد المرور وترك تعليق انا بعتبره وصف لمملكه
بس افتكر جمله قالها اخى الباحث عن الحقيقه
ولقد اصبحت مدونتك اشبه بالعروس الناضجه الرائعه مع مرور الوقت تزداد جمالا وبهاءا ونضجا
التعليقات بالنسبه لك ,اهميتها؟
التعليق بالنسبه لى تقدير من الاخر
وبيحسسنى ان كلماتى لمست قلب الى قراها
وهو ده هدفى
ان ما اكتبه يصل للقلوب
وبالطبع ليس احدا هنا مجبر على ترك تعليق
وطالما ترك تعليق حتى لو كلمه واحده يبقى اكيد الى كتبته وصل لقلبه
بس مش بزعل لو فى موضوع ملقيتش عليه تعليق
لان فى النهايه مدونتى بالنسبه لى مملكتى الخاصه
ومش لازم ابدا كل شئ موجود فى مملكتك الخاصه ينال اعجاب الاخرين
احلى بوست كتبته ...ضع اللينك , ثم اذكرلماذا؟؟؟
بصراحه اى بوست كتبته فانا مقتنعه بيه مليون الميه ووبتعتبره جزء منى
بصراحه بحبهم كلهم بدون تفرقه
لانهم ترجمه لمشاعرى وافكارى
أفضل بوست قرأته؟ وضع لينكه؟
بالنسبه لافضل بوست قراته
بصراحه قرات بوستات جميله جدا فى كتير من المدونات الى بتابعها باستمرار
مش عايز اذكر بوست وانسى بوست
عشان البوستات متزعلش منى
طالما قرات البوست وعلقت عليه يبقى عجبنى جداااااااااااااااااااااااا
أفضل مدونة قرأتها؟
كل المدونات الى بتابعها جميله
ومفيش مدونه منهم تعلو الاخرى
لان كل مدونه منهم لها طابعها الخاص
فى الطابع الشعرى
وفى الطابع الروحانى
وفى الاجتماعى
وفى الفقهى
اى مدونه وضعت بها تعليق لى تبقى مفضله بالنسبه لى
حد قل أدبه فى التعليق إيه رد فعلك؟؟؟؟؟؟؟
بصراحه محصلتش قبل كده وحد كتب رد هنا فى المدونه يتعدى حدود الادب
بس لو حصل وحد تعدى حدود الادب اكيد هحذف رده بسرعه جدا
عشان محدش يقرى الكلام ويتاذى منه
لكن لو كان رده فى حدود الادب ولكن كلام فيه نقد بناء للموضوع اكيد هرد عليه واناقشه واكيد هستفيد من ملاحظاته
أسوأ مدونة؟
بصراحه مشفتش مدونات سيئه لغايه دلوقتى
أسوأ بوست أسوأ مدون؟
والله زى ما قلت فوق مقابلتش لغايه دلوقتى مدونه سيئه وبالتالى مفيش بوست ولا مدون سيئين عندى
بس اكيد فى
عدم علمى بيهم لا ينفى وجودهم
هيحصل ايه لإيميلك لما تموت ؟؟
عادى بعد سنه هيقع تلقائيا وهيضيع ومش هيكون له وجود
زى مانا بالظبط مش هيكون لى وجود
بس الى متاكده منه
انه هيكون له وجود فى قلب اى حد ضافنى عنده
زى ما هيكون لى وجود فى قلوب الى يعرفونى
يمكن الماديات تموت
لكن الحب عمره ما بيموت
واكيد الايميل هيكون عايش جوه ايميلا ت الناس الى بتحبنى وانا متضافه عندهم
وده فعلا الى بتمناه
انى ممتش فى قلوب الى اعرفهم
اديت الباسوورد لحد قبل كده؟
بصراحه عمرى ما عملتها
عمرى ما اديت اى باسورد خاص بيا لاى شخص
واعتقد انى عمرى ما هعمل كده
فى وقت فكرت اديه بصراحه لواحده صاحبتى هى بمثابه اختى
خوفا من انى لو مت يكون معاها
بس كانت مجرد فكره ونسيتها
كانت إيه طبيعة علاقتك بيه؟
ما هو محدش اخده
:)
اسمك؟
امه الله اسماء
المشهور بيه وسط اصحابك؟
سمسم
شخصيتك نوعها إيه؟
والله لو هتحكم عليها من ناحيه التنميه البشريه
اعتقد انها شخصيه بصريه
لو وصفها على حد تفكيرى
شخصيه كوكتيل
هاديه وقت الهدوء مرحه وقت المرح حزينه وقت الحزن
بصراحه ملهاش طبيعه ثابته
لكن الاساس فيها شخصيه رومانسيه شويه والقلب غالب حبتين
لكن الحمد لله عقلانيه مهما على صوت القلب
السفر بالنسبة لك؟
السفر بالنسبه لى حلم اتمنى تحقيقه
بحس انه متعه ليس لها مثيل
واتمنى تتحقق قريب فعلا
لانى حاسه انه هيكون تغيير فى كل حياتى للافضل
وهتعلم منه كتييييييييير اوى
فى السفر 7 فوائد
وقت فراغك بتعمل فيه إيه؟
والله بعمل فيه حاجات كتير
اهمها طبعا هواياتى
يعنى قراءه
كتابه اشعار
سماع موسيقى
ممكن تامل فى لحظات مرت بيا
وساعات تامل فى جمال الطبيعه والذهاب لعالم الخيال من خلال الكون زى البحر مثلا او السماء او عصفوره صغيره
المود بتاعك؟
المود بتاعى متغير بتغير الموقف
بس سريعه البكاء
سريعه الغضب
ومش بسهوله انى اتراجع عن موقف واسامح
الاكلة المفضلة؟
بصراحه مفيش اكله معينه بتتميز عندى
الاكل ملهوش قدر كبير فى تفكيرى
الصفات اللي أخدتها من بابا؟
ياااااااااااااااااااااااااه اخدت منه حاجات كتيره اوى
العناد
التصميم على الراى ومحاوله الوصول للهدف مهما كان صعب
عزه النفس
الهدوء فى بعض الاحيان
حب القراءه
التعامل بحسن نيه مع الناس
الطيبه
حاجات كتيره اوى يمكن كتير من شخصيتى هو السبب فيها
الصفات التي أخدتها من ماما ؟
ماما اخدت منها سرعه البكاء
وعزه النفس
بصراحه تاثرى ببابا كان اكبر
اكتر ست حاجات بكرهها؟
الكذب
الخداع
النفاق
القسوه
التجاهل
الخيانه
اكتر ست حاجات بحبها؟
الصدق
الطيبه
البحر والطبيعه عامه وخاصه البحر والسماء والعصافير والورود
التواضع
الحنان
الشعور بالاخر
ويمكن اكتر شئ هو الشعور بالاخر لان اكبر مشاكلنا لو دورنا على اصلها هنلاقى عدم الشعور بالاخر هو سببها
ازمه بلدنا كلها سببها عدم الشعور بالاخر
الشغل بالنسبة لك؟
الشغل بالنسبه لى هو الحياه
من غيره بحس انى مليش قيمه ولا هدف ولا فايده
وسيله لتخفيف الالام الناس
حلم حلمته زمان انى اشتغل واخفف الالامهم واتمنى انى اكون سبب فى مسح الالامهم واحزانهم
الانترنت بالنسبه لك؟
اتعلمت منه كتييييييييييييييير اوى اوى
هو نعمه ونقمه
كان سبب فى فرحى وحزنى
الانترنت اثر فى حياتى بشكل كبير جدا
هو حياه وهميه تخلقها انت بارادتك
مليان عبر وقصص بتتعلم منها كتير اوى
كان سبب فى قربى من ربنا وجزء من التزامى
وللاسف فى بعض الاحيان كان تضييع وقت وبعدنى شويه عن حاجات كويسه كنت بعملها
امرره لمين ؟
بصراحه امرره لمونى حبيبتى صاحبه مدونه نويت اكوم مستقبلى
3 comments:
الاخت / اسماء
السلام عليكم ورحمة الله وبركاته
اولا : اشكرك على استجابتك لعرض التاج على حضرتك وتقبلك له فشكر جزيلا لحضرتك
ثانيا:انا مش هقولك يا دكتوره لانى فعلا وسبق قلت لحضرتك يا دكتوره انى يا دكتوره باعتبرك اختى
ثالثا:بالنسبه ليا التاج لم يضيف لى معلومات جديده عن اسماء لان من يقرأ مدونتك سيكتشف بسهوله انه امام انسانه رومانسيه وحساسه ومتدينة طبعا واهتمامها بالاخرين اهتمام كبير جدا وربما كان زائد عن الحد لانك بتتأثرى نفسيا بمشاكل الناس وظروفهم
رابعا: احب أؤكد على معلومة وانه فعلا مدونتك راح تعيش فى قلوب زوار مملكتك ..صدقينى الاحساس الصادق لا يمكن يتنسى وانسانه عاشت حياتها للاخرين لايمكن الاخرين ينسوها
خامسا:يعنى ايه شخصية بصريه؟
سادسا:حرمتينا ليه من اشعارك وخواطرك..عموما انتى كل كلامك اشعار
وانا لازلت اشعر بسعاده فى كل مره تذكرت فيها قصيدة بطلى نور العين
مش عارف ليه لم تنشريها بالمدونه
انا فكرت انشرها عندى لكن جو المدونة عندى موضوعات فكريه ونقاشيه حاميه عموما انا هفضل منتظرها هنا فى المملكه ولو حتى بعد رمضان او فى اى وقت تحبيه وانا سعيد جدا انك سمحتيلى وقتها اشارك فى كتابتها
اسفه جدا لتاخرى فى الرد بس النت كان فاصل ):
عليكم السلام ورحمه الله وبركاته
اخى\الباحث
لقب دكتوره ده للمرضى فقط واحنا هنا كلنا اخوه
اولا جزاك الله خيرا على التاج وجزاك الله خيرا على كلماتك ليا
اللهم اجعلنى خيرا مما يظنون واغفر لى ما لايعلمون
وجزاك الله خيرا على وصفك للمدونه وانا فعلا اتمنى من ربنا انها تفضل عايشه جوه قلوب الناس وربنا عالم ان اى شئ بكتبه بيكون صادق وتلقائى
ثانيا بالنسبه لموضوع يعنى ايه شخصيه بصريه
من خلال تواجدى فى مهرجان وكان فى فقره عن التنميه البشريه
يومها قسم الشخصيات لتلت انواع
شخصيه بصريه
شخصيه سمعيه
شخصيه حسيه
انا يومها حسيت انى اقرب للشخصيه البصريه
ودى شخصيه بتتميز اولا انها شخصيه
بتعتمد على التخيل اكتر
بمعنى مثلا انها تحب تسمع مثلا مسلسل فى الراديو وتتخيل احداثه اكتر من انها تتفرج عليه فى التليفزيون
وكمان شخصيه بتتميز بسرعه اتخاذ القرار
وشخصيه نشطه
شخصيه سريعه الانفعال والغضب
شخصيه عندما توضع تحت ضغط عصبى بيصيبها بالارتباك ومش من السهل انها توصل لقرار سليم وقتها
شخصيه مش بتحب التفاصيل اوى وبتحب تعرف مجمل الاشياء او مضمونها يعنى مش شخصيه تفصيليه
شخصيه مش مستمعه جيده للاخرين ولو ان يعنى انا بستمع للاخرين كويس
بس دى عموما مجمل صفات الشخصيه البصريه
طبعا انت مش بتكون واخد كل الصفات دى بالظبط
لكن بتكون واخد جزء كبير منها
ثالثا بالنسبه لموضوع الخواطر والاشعار فانا مقله لاسباب نفسيه منعانى من الكتابه ربنا ييسر الحال واسترد نفسى واكتب من جديد
ام قصيده بطلى يا نور العين
فانا طبعا ترددى فى نشرها كان سببه خوف يمكن حضرتك تدايق لكن طالما حضرتك موافق على نشرها
فباذن الله هنشرها
وناويه باذن الله كل الخواطر القديمه انزلها هنا بس من وقت للتانى ان ربنا احيانا
كل سنه وحضرتك طيب اخى الباحث رمضان كريم
وحضرتك طيبه ان شاء الله
Post a Comment