السلام عليكم ورحمه الله وبركاته
********************
بقالى فتره طويله جدا مدونتش وحشتنى المملكه جدااااااااااااااااااااا فوق الوصف
فعلا هى جزء منى
الايام الى فاتت كان فى تدوينات كتيره بس للاسف النت مكنش شغال
اد ايه ممكن جماد يغلبك ويمنعك عن التعبير عما بداخلك
ولانى للاسف مش بعرف اكتب الى جوايا فى صفحه ورد مثلا
لازم اكتب هنا فى المدونه نفسها
مش هطول عليكم النهارده جايه اتكلم عن موقفين حصلوا
الهدف مش الدفاع عن مهنتى مثلا
لانها لوجه الله تعالى ومش مهم الناس تفهم او متفهمش
بس كل موقف منهم بياكد
من يتق الله يجعل له مخرجا ويرزقه من حيث لا يحتسب
طبعا هى مش محتاجه تاكيد اصلا منى او من غيرى بس ده مجرد مثال حى حصل
الموقف الاول خاص بالجزء الاول من يتق الله يجعل له مخرجا
والموقف التانى خاص بالجزء التانى ويرزقه من حيث لا يحتسب
يعنى كعادتى دايما مش ببص للمرضى والمواقف بالعين العاديه
ولكن بالعين المتامله شويه
يوم زى اى يوم فى حوادث الجراحه
ملايين القصص والحكايات والمواقف
فعلا مدرسه الحياه هناك
بس للانسان الى يملك قلب مازال ينبض بالرحمه وتقوى الله
هناك بتشوف فعلا حقيقه الحياه
بتشوف اد ايه الحياه هينه وممكن فى ثانيه تفقد كل حياتك
فى ثانيه هتبقى بين ايدين ربنا
فى ثانيه تتوقف اعمالك سواء خير او شر
ياااااااااااااااااااه فى ثانيه مش هيبقى ادامك فرصه تانيه
يعنى الى عملته هو ده خلاص نصيبك من الدنيا
هتقابل ربنا خلاص وتتحاسب
ويا اما جنه خلود
ياما جهنم والعياذ بالله
مشاعر رهيبه بتخطر على بالى خاصه فى اللحظات الاخيره من الحياه
العيان بين ايديك وعارف انه خلاص بيفارق الحياه
وفى نفس اللحظه اهله نفسهم تقولهم لسه فى امل
الامل فى الله طبعا
وقتها بتسكت وتتلجم ومش بتلاقى غير الصمت يعبر
لحظات رهيبه وخاصه لما تعيشها فى الشهر الكريم
يارب اجعلنا من عتقاء النار واحسن خواتيمنا
نرجع بقى للموقفين
الموقف الاول
رجل عمل حادثه فى الطريق وممعهوش اى شئ ممكن نوصل بيه لاهله
غايب عن الوعى
مفيش حد معاه
كل الى قدروا يوصلوا ليه رقم واحد
الواحد ده اصلا ميعرفش عنه اى شئ
الراجل الى حصلت له الحادثه كان بيصلح له حاجه واخد رقمه وبس
تخيلوا راجل غريب عنه تماما
فضل سهران معاه طول الليل
مستنيه يفوق علشان يساله فين اهله
خايف وقلقان
راجل فى وجهه علامات التقوى والايمان
سيماهم فى وجوههم فعلا
ايه الى يخلى راجل يعمل كده
كان ممكن جدا يروح ويسيبه ويقول معرفش عنه حاجه
لكن لسه فى خير فى الامه الاسلاميه
كمان فى رحمه ربنا
ربنا سخر له الراجل ده عشان ياخد باله منه
وعشان كمان يقول لاى حد يتامل الموقف
ان لسه فى خير
ولما فاق الراجل وقدرنا نتصل بحد من اهله
لما جه قريبه وحكيت له على الى حصل
قالى ان ربنا سخر له حد يقف جنبه لانه غلبان وطيب
كل ما كنت بتراعى ربنا ومعاه بقلبك
كل ما ربنا وقف معاك فى محنتك
وطبعا رحمه ربنا اوسع من اعمالنا
فعلا
من يتق الله يجعل له مخرجا
وفضلنا طول الليل نتابع ضغطه ونبضه على الرغم من انه غلبان ومفيش اصلا حد معاه ولا ابن فلان وقريب علان
علشان بس الى دايما بيتقال عن الاهمال وقله الضمير
جايز فعلا مش الكل عنده ضمير
لكن الاكيد ان مازال الضمير موجود
نيجى للموقف التانى
ويرزقه من حيث لا يحتسب
طيب ازاى
ببساطه هو نفس الراجل
احنا تابعناه وفضلنا مهتمين بيه
طبعا لوجه الله تعالى
مش منتظرين اى شئ
ولما جه قريبه وبدانا نخيطه طبعا بعد ما فاق وبعد ما حاربنا عشان نحصل على الادوات الى هنخيطه بيها
اصل عمار يا مصر عمار
واهلا وسهلا بانعدام الامكانيات
على الرغم من الميزانيات المتلتله الى بترجع زى ما هى علشان صاحب الكرسى ميسبهوش
المهم يعنى
قريب الراجل عرض علينا شغل فى مركز طبى
مش لاننا اهتمينا بيه
بس لانه حس ان لسه فى ناس عندها ضمير وبتشتغل بيه
وبتراعى ربنا
وبتتعامل مع خلق الله بما يرضى الله
واحنا فعلا كنا محتاجين شغل
يبقى الى بيتقى الله هيرزقه بردوا من حيث لا يحتسب
اد ايه المواقف ممكن تبدو بسيطه
محدش اصلا ياخد باله
لكن لو تاملنا
هنفهم الدرس
هنستوعب الاشارات الربانيه من الله عزوجل
يا جماعه تقوى الله دى شئ عظيم
هو نورك وانت مغمض
هو طريقك المستقيم فى اشد اوقات الفتن
هو القلعه الى هتحميك وقت الخطر
هو طريقك للجنه فى عصر تفاقمت فيه كل انواع الفتن
انتشر الكدب والخداع
كثرت فيه المؤامرات والنفاق
اللهم اهدنا لطريق التقوى والايمان
واجعل كل اعمالنا خالصه لوجهك يا على يا عظيم
ولا تجعل للرياء والسمعه منها نصيبا
اللهم انر بصيرتنا بنورك الجليل
وتقبل اعمالنا يا قوى يا عزيز
واجعلنا من عتقاء الشهر الكريم
واغفر لمؤمنين والمؤمنات والمسلمين والمسلمات الاحياء منهم والاموات
وصلى اللهم وسلم على سيدنا محمد صلى الله عليه وسلم سيد الخلق اجمعين
4 comments:
لا إله إلا الله
بجد مش عارف اقول ايه
انا كنت بجد هبكى وانا بقرأ فى الجزء الاول عن الحادثه وقت لو اسماء كتبت موضوعات مؤثره كده تانى انا مش هدخل هنا لان انا اعصابى ما تستحملش مواقف مؤثره فعلا
لكن الجزء التانى ولما شفت جزاء ربنا لكم فرحت ..فرحت مش علشانكم
فرحت علشان هو ده ربنا : ومن اصدق من الله قيلا
ربنا قال فصدق
يااااه لو نسمع كلامه ونصدقه ونطيعه فى كل حاجه امرنا بيها
ربنا جميل وعظيم ..وبيحبنا
نخلى احنا بقى عندنا شوية دم ونحب ربنا
ونحسن التوكل على الله
ربنا يكرمك يا اختى الدكتوره اسماء
انا عايز اقدم فيكى شكوى علشان ينقلوكى اسيوط
بس علشان نيجى نعمل تشيك اب ..وربنا يعافينا ويعافيكم وكل المسلمين يا رب
كل سنه وانتى بألف خير
اخى الباحث
جزاك الله خيرا على المرور
وفعلا احنا محتاجين نحب ربنا بجد ونتقيه ونرجع له
ملايين المواقف بتحصل لى ايام الحوادث بالذات
فعلا لو الواحد تفكر فيها وتامل هيبكى على نفسه وحاله
دى كلها عظات وتنبيهات وعلينا اننا ننتبه ليها
مش نفارق المدونه هنا ونسيبها
وعلى فكره بلاش تبشر عليا فى حكايه انهم ينقلونى اسيوط دى
بدل ما تكليفى يجى عندكم وتبقى كارثه
مش علشان عندكم يعنى بس علشان انتو بعيد اوى وكمان الجو هناك حر اوى
ربنا يرزقكم هناك بالى افضل منى مليون مره
والتشيك اب مش غالى هما اهل اسيوط بخلا ولا ايه
ربنا يعافى كل المسلمين يارب ويديم عليكم الصحه لانها نعمه كبيره جدااااااا
كل سنه وانت بالف خير
معلهش افتكرت موقف عايز احكيه
كان فيه شخص جاله انسداد فى الشرايين راح للدكتور لوحده لانى خبى على اهله انه مريض اول ما وصل العياده مقدرش يطلع السلم راح قعد على القهوه اللى تحت ياخد نفسه شويه وكان حاسس انه بيودع
وهوقاعد على القهوه بس لقى واحد جاى يلف على الناس عايز يبيع الباقى فى علبة سجايره وولاعته
محدش اشترى منه طبعا علبه سجاير مفتوحه وافتكروه مخبول او فى دماغه حاجه رغم انه كان باين عليه غلبان وطيب ومش مجنون ولا حاجه
بعد ما مشى راح وقف على جنب وحط ايده فى وسطه وقعد يبص يمين ويبص شمال ومحتار مش عارف يعمل ايه الشخص ده قال لواحد قاعد قباله فى القهوه : على فكره الراجل ده مزنوق ومش بياع لانه بيبيع علبة سجايره المفتوحه وولاعته بس ومش معاه غيرهم روح انده عليه
نده عليه فعلا وسأله: انت حكايتك ايه
قاله انا راجل غلبان من سوهاج وبنتى فى مستشفى الجامعه وقالولى روح اشتريلها اكل تاكل احسن من اكل المستشفى وانا مش معايا فلوس اشتريلها تاكل
فراح مطلع اللى فيه النصيب واعطاه للرجل ده فاخدهم الراجل وهو بيدعيله
الشخص المريض ده وهو قاعد تقريبا افتكر حاجه فى عربيته فراح علشان يجيبها من العربيه ..قام من على القهوه فشعر انه سليم جدا وانه احسن من الاول ومشى ناحية العربيه وهو مش مصدق نفسه لانه كان وهو قاعد على القهوه بيقول لنفسه انه هيموت
قال: بعد ما مشى الراجل ندمت انى لم اعطيه اكثر مما اعطيته
رغم انها كانت صدقه بسيطه لكن عند ربنا انقذته من الموت وانقذت زوجته واولاده من بعده من الضياع
سبحان الله
اولا ليا تعليقين على القصه الى قولتها
القصه بتؤكد حديث حبيبنا رسول الله صلى الله عليه وسلم
داووا مرضاكم بالصدقات
صدق رسول الله صلى الله عليه وسلم
فعلا وعن تجربه وكتير من الحكايات سمعتها
ان الصدقه فعلا لها تاثير السحر وخاصه بالنسبه لموضوع المرض
ومش هننسى حكايه ابو الدحداح
رجال صدقوا ما عاهدوا الله عليه
والجنينه الى وهبها لله عزوجل واخرج زوجته واولاده منها
الصدقه لها فضل كبير فى حياتنا بس للاسف احنا ناسيينها
لو كل انسان خصص جزء من مرتبه الشهرى للصدقه
هيلاقى البركه ملات حياته كلها
لو كل زوج وزوجه عملوا صندوق او حصاله يحطوا فيه يوميا اى مبلغ ان شاء الله حتى ربع جنيه واخر الشهر تصدقوا بيه اكيد هيحسوا بالفرق فى حياتهم
اد ايه الصدقه هتفرق كتير مع ناس مش لاقيه حق الرغيف الحاف
الحمد لله على نعم ربنا علينا
التعليق التانى بقى
هو الراجل الى بيبيع علبه السجاير والولاعه
حضرته لو مكنش بيدخن ويولع فى فلوسه
جايز جدا مكنش اتحط فى الموقف ده
للاسف ساعات البشر بيكونوا السبب فى فقرهم وحوجتهم
لانهم ببساطه مش بيحسنوا التصرف
بيضيعوا فلوسهم فى اشياء ضاره ومحرمه مثلا زى السجاير
او بيصرفوها فى كماليات واشياء للمنظره فقط والتفاخر
عشان كده ممكن يلاقوا نفسهم فى المواقف دى
ربنا يسترها معانا جميعا ويهدينا لما فيه طاعته ورضاه
جزاك الله خيرا على القصه الجميله دى
Post a Comment