Tuesday, November 20, 2007

فتاه المطر

على صوت المطر
حيث صمت كل البشر
تسائل
هل تحبينه يا فتاه المطر؟
وتتركين كل البشر!!
صمتت فتاه المطر
واغمضت عينيها وتنفست من الاعماق
لتحاول ان ترى بداخلها كل الاشواق
ثم قالت فى همس
لا اعلم وليتنى لا اعلم
تعجب صوت المطر
من اجابات البشر
الا تودين الوصول للحقيقه؟
وتستمرى بهذه الطريقه!!
اجابته الفتاه
انى اخاف الاه
واخشى غدر الحياه
حبيبتى
هونا على قلبك الرقيق يا صغيرتى
لما كل هذا الخوف يا رقيقتى ؟
اشعر بهواه يزلزل كل وجدانى
وامواجه تهز كيانى
ويتخطى بطموحه كل احلامى
وياخذنى حتى من نفسى
وينسينى يومى وامسى
ابعد كل هذا تتسائل!!!!!!!!!!!!!
وتتعجب انى لا اتفائل
رقيقتى
ان كان رفيقك ستذوب كل الصعاب
وتفتح كل الابواب
لا يهم ان كان رفيقا ام لا
فمعه تعلمت معنى الحياه
ولن اتنازل يوما عنه مهما قالت الافواه
يكفى ان اكون بجواره
واقرا رقه اشعاره
واحيا فى نور نهاره
وهكذا استمر الحوار
بين الفتاه وصوت الامطار
ولم نجد له حتى الان نهايه او قرار

عفوا سيدتى

يا بحرا ثائر فى ظلمات الليل يعاند احلامى
ويزلزل روحى ويتغلغل فى وجدانى
وينادى من داخل قلبى ...........عفوا سيدتى
ما انتى باميرة مملكتى واحلامى
ولستى انتى صانعه ازمانى
ما انتى الا فتاة تتلاعب بمشاعر وجدانى
ترقص طربا على انات قلبى
وتهمس كذبا فى داخل اذانى
اهواكى
اهواكى يا ملكه كل رجال العالم
ولستى بمليكه ايامى
اعشق لهوكى بين حبات رمالى
واذوب عشقا عندما تلمس اناملك الرقيقه شواطئ وامواجى
عفوا
عفوا سيدتى
لن اقبل يوما ان تنتصرى على كبريائى
ويظل غدرك يلقينى فى بحر عنائى
وابات الليل اناجيكى لاذكرك بلقائى
لن اقبل هذا وذاك
لذا قررت سيدتى
ان اخلع ثوبى وردائى
سافك القيد والقيكى فى بئر نسيانى
واعود لاحلم واتخطى احزانى
فلن اقبل سيدتى ابدا
ان تكونى سر شقائى

Sunday, November 11, 2007

السفر فى بحر الظلمات

السلام عليكم ورحمه الله وبركاته
-----------------------
على الرغم من كونى انتمى للاسكندريه طوال سنوات حياتى
وعلى الرغم من عشقى لها وتحديدا عشقى اللانهائى لبحرها
لاول مره فى حياتى اتمعن فى اسم هذا البحر وافكر فيه مليا
هل هو حقا اسم على ما يسمى كما يقال
ام انه وهم كاذب
البحر الابيض المتوسط
بحر ابيض يذكرك بلون اللبن الصافى المليئ بالخير والصفاء
ولكن هل يا ترى اين هى الخيرات؟
اين هو الصفاء؟
هذا التساؤل مر بخاطرى عندما قرات مقاله شاعرى المفضل الذى لا امل من قراءه اى حرف يكتبه
فاروق جويده
فى جريده الاهرام
مقال عن غرق شبابنا فى البحر( الاسود )عفوا البحر الابيض
ولكى اكون دقيقه فى تعبيرى فهو انتحار شبابنا وليس غرقهم
فالغرق ياتى بالصدفه وانت لا تتوقعه
ولكن الانتحار ياتى عن عمد وياتى عن علم مسبق بالخطر
وهذا ما حدث تحديدا
فهذه ليست المره الاولى التى يسافر فيها شبابنا عن طريق البحر سفر غير شرعى ويكون الغرق هو مصيرهم
وهنا ياتى السؤال ويلح بشده على اذانى
لماذا يسافر الشباب؟
لماذا يتحملون كل الوان المخاطر وربما الموت غرقا فى سبيل السفر؟
ولن اسميه الرغبه فى السفر
ولكن
هى رغبه فى الهروب من بلادنا الحبيبه
مصر
اذا
لماذا نهرب منها ونتحمل تلك المخاطر؟؟؟؟؟؟
الاجابه بسيطه جداااااااااااااااااا
ستجدها فى مقاهى مصر المحروسه
فى شوارعها الممتلئه بالشباب العاطل
ستجدها على رؤوس الشوارع المكتظه بشباب انعدمت هويته
طمست احلامه
اغتصبت كل اهدافه واماله
فى ظل حكومه وحاشيه لا تملك ولن تملك سوى الظلم
لا يوجد فى جعبتها سوى السهام المسمومه
لن اشرح ماساه مصر
ولكن ببساطه اجابه السؤال تتلخص فى جمله واحده
نحن شباب عاطلون لا نجد ما يحيى ماء وجهنا ولا نرى اى امل فى طريقنا
لذا قررنا الانتحار
عفوا اعتذر
قررنا السفر للخارج
تناول فاروق جويده فى مقالته مفارقه كبيره على جانبى الشاطئ
وتزامن النقيضين
مارينا وكل الوان الترف والبزخ والثراء الفاحش واحتفالات اليخت وتصوير التليقزيون المصرى لها
وبين الجانب الاخر المليئ بحثث الشباب المصريين على شواطئ ايطاليا وتصوير الفضائيات العالميه للحادث المرير
وهنا تاتى الماساه الحقيقه
ليس فقط الثراء الفاحش وما يقابله من الفقر المدقع
ولكن التعتيم الاعلامى
وتصوير مصر وكانها جنه الله على الارض
وكاننا لا يوجد عندنا فقراء وان كل شئ تلون باللون الوردى
لا اعلم الى اين نحن ذاهبون والى مدى سيصل بنا الحال
حقيقه اشعر بالمراره وانا اتحدث الان
وبالفعل انا ممن يحلمون بالسفر الى الخارج
ولكن ليس سفرا غير شرعى
ولكنه سفر لابد له من استعداد حتى لا اذوق مراره اخرى فى الغربه
فيكفى وجود الغربه
عفوا هنا ينقطع الكلام وتتوقف كل الحروف عجبا مما يحدث ومما يقال
و اقف عاجزه عن التعبير
ولن احاول ايجاد حلول
فمن يجد حلا فلياتى لينفذه
فاعتقد ان زمن الكلام قد طاااااااااااااااااااااااااااال وتاااااااااااااااااخر زمن الافعال

Tuesday, November 6, 2007

بطلى يا نور العين - زجل مشترك

يا قلب ليه مالك شايل كتير الهم

بصيت فى جدرانك ما لاقيت غير الهم

مالك كده متلهف وبتدور على بطلك

هناك فى وسط الوشوش ولحد شاف حزنك

دارت عيونى تبص فى كل وش و وش

وشكل الوشوش ما فيها صوره الى غاب

حبيبى فينك ما بينهم

مش كنا متواعدين

على حبى متعاهدين

يا ما قلت لى انك راجع مع كل طلعه شمس

فينك يا نور العين

سايبنى فين ولمين

يا دم بيجرى جوه شريانى

حبيبى يا كل اوطانى

يا همس قلبى وكحل اجفانى

يا الف روح بتروح لما الاقى هواك

يا الف كلمه وكلمه باكتبها لما القاك

لفيت ودورت كتير ولا حد راضى يرد

اصرخ باعلى صوت ما حد ناوى يرد

اياك تكون خليت بوعد كان بينا

ده انت الهنا والميل والوعد كان بينا

جانى البطل بيقول

راح الحبيب يا نور

صرخ الام جوايا وقال باعلى صوت

حبيبى ما يخلى بعهد قاله فى يوم

مهما طال الزمن مسيره يجى فى يوم

قالوا دى تاه عقلها وصارت من الدراويش

قلت لهم ما تعرفوا حبيبى ابو العهود

ده فارس شديد مغواركلامه زى السيف

هتشوفوا لما يكون منار واضح وضوح الشمس

على فجائه جه يهمس انا جيت يا نور العين

حبيبى

مش قلت انه فارس اد الكلام بيكون

اهو جه يا الف وش و وش بين الوشوش بتلوم

ما كنت يوم درويشه ده القلب حاسس بيه

وبقلبى بحلم بيه

بحلم بيوم القاه ده يبقى يوم المنى

طلع خلاص الفجر وجاب معاه الافراح

ينده باعلى صوت رجعت نور العين

حبيبى

نورت قلبى وعقلى وكل دنياى

وجيبت لى نصر بلادى ومعاه وردايه

تسلم يا نور العين من اى غدر يكون

ده انت فارس فى وسط الكون

ومالى غيرك حبيب

تسلم يا نور العين




انا جيت يا نور العين
جيت اقولك انى على العهد باقى
وانا لا جبان ولا خوان ولا ناسى
ده انا اللى عايش ليكى وفيكى بكل احساسى
انا اللى كل نقطة دم فيا بتقولك وحشتينى
يا عمرى يا قلبى يا نورعينى
جيت ..علشان اسلم وامشى
سامحينى.. لسه المشوار مخلصشى
لسه الميدان قايد نار ومستنى
محتاج لسيفى وسيف كل عاشق زيى
عاشق صبية عربية قدسية
فلسطينية عراقية صوماليه
هى الهوية والجنسية واحلامى اللى جاية
هى الكرامة والكرامه تحتاج لحراس
يشهروا سيوفهم فى وش الاعادى الانجاس
من كل لون وملة يا صبية اتلموا علينا
كلاب ملاعين اتلفوا من حوالينا
وانتى الضحية يا صبية وانا الشهيد
شهيد ولسه فى العمر بقيه
متخافيش يا صبية من الملاعين
وحياة حبى ماراجع إلا بألف عيد
عيد النصر ,عيد الشرف ,عيد الكرامه وعيد ...وعيد ...وعيد
ايامك كلها هتكون اعياد ..وانا
افتكرينى يا صبية مع كل فجر وادعيلى
وقولى حبيبى عاش بطل ومات شهيد




منا قلت لللايمين حبيبى جايلى يا ناس

مليان دفى واحساس

ما حد صدقنى وقالوا من الدراويش

تاه عقلها من حب نور العين

حبيبى يا كل الهنا ليا

يا قلبى وضى لياليا

حبيبى فى كل صلواتى بدعى واقول يا رب

انصرلى نور العين ده ماله غيرك يا رب

سابنى وراح ليهم شاهر سيوف الحق

ما هما منى احق

انا عارفه انك عشت لاجل تحميهم

انا عارفه انك غايب لاجل امانيهم

وجعت قلبى يا نور

بينا بلاد وبحور

وانا لسه منسيه

فى همومى ملهيه

سلامك كلامك هلوا

طلوا وبعدين ولوا

وجعت قلبى يا نور

انا عارفه انك فارس وياما هتوريهم

انا عارفه انك صاين لكل غنواينا

وعارفه انك فاكر ايامنا ولياليهم

قلبى معاك فى ميدانك بس اوعاك تغيب

انا لسه مستنيه ترجع لى تانى حبيب

وتكون لحضنى قريب

ومهما طال البعد

ومهما دقت المر

انا باقيه على عهدى

وصاينه كل الود

مع كل طلعه فجر وفى كل صلواتى

مع كل طلة شمس ملامسه قمرايه

مع كل نجمه سابحه فى الفلك فوق ماشيه

قلبى يسبح لرب الكون

رب السما والارض

وادعى باعلى صوت

حبيبى نور العين

ربى احفظه من الغيم

واحميه من الغادرين

واعدائنا الحاقدين

قويه بايمانك

وانصره نصر عزيز

على كل اعدائك

اديله قوه وهمه يهد بيها جبال

اديله قوه وهمه يشق بيها الغيم

غيم اليهود والكفره وكل اعدائنا

ياربى انتى الاعلى والنصر من عندك

قويه ده شاب جسور وماله غير عدلك

سابنى هنا وحدى ومالى شكوى لغيرك

قالى الزمى مطرحك ده المولى هنا صاينك

وادعيلى ارجعلك بالف عيد منصور

دعيت بكل جوارحى لرب العباد والكون

يرجعلى شايل سيوفه وعليها دم الكلاب

كلاب باتوا ينهشوا فى صبايا زى الورد

وشباب فى اول عمره عمال كده بينهد

وعيال فى لون الورد قتلوهم بكل الغدر

عوضى عليك يا رب

قلبى هنا بيبكى عشانكوا يا صبايا

قلبى الى عايش هناك فى قلب نور العين

ترجع بالف سلامه يا احلى وردايه

انت يا نور العين



مسافر وقلبى معاكى
فاكر كل لحظه عاشها وياكى
فاكره زمان يا نور عينى
لما بمية نيلك كنتى توضينى
وتتوضى وتقفى على يمينى
الله اكبر ..يا خالق الحب وحبيبى
لسه عبيرك ساعة الفجر بيجينى يصحينى
ويقولى انك صاحية بتدعيلى
شايفك ماسكه المصحف تذكرى كلام الله
سامع صوتك.. مره آيه ومره يتنهد آه
ومره ترفعى ايدك :يارب احفظ حبيبى
رجعلى نور عينى منتصر على الطغاه
انا اللى ف حبك بقيت درويش
آه ه ه يا وجع البعاد لولا رب العباد فى بعدك ماكنت اعيش
وصيتى ليكى يا صبية يا نور العين
خدى بالك من نفسك ومن دينك
خدى بالك من اهراماتك ومن نيلك
خلينى دايما فى بالك
انا اللى حياتى وموتى علشانك
ولا يهمك قول اللايمين
وادعيلى بقلبك لو مت فى بعدك
اكون مع الشهداء والصالحين




حبيبى نور العين يسلم لى احساسك

ده انت الامل والهنا وابوس كمان راسك

فاكرنى ساعه الفجر يا ارق خلق الله

انا صاينه نفسى ليك وكل املى الاقيكقاعد هنا جنبى

تتوضى من نيلنا

تصلى وتدعيلنا

فاكره يوم ما صحيت وانت هنا جنبى

تبص لعيونى وناسى كل الكون

حرمتك يومها النوم ولمت فيك نفسى

ده قلبى لو عاش سنينه يدعيلك

ما يوفى يوم حبك

يا ارق خلق الله

يا كل امانيا

دايما فى بالى حبيب

ما يمسك اللايمين

ده انت الامل يا حبيب

انت يا نور العين

عايزاك تعيش انسان

وتقتل الكفره

بس ترجعلى

اوعى تموت فى البعد

ده قلبى لا يقوى على احتمال بعدك

يموت قلبى وراك

ولا يرضى غيرك فارس يضم ايامه

اتمنى نموت شهدا بس اكون جنبك

خدنى يا نور العين احارب الكفره

انول شهادتى معاك ما تسيبنى هنا وحدى

ندخل الجنه وهناك يزفونا

ملايكه الرحمه

انت وانا يا حبيب

يا عشق ايامى

انت يا نور العين




زجل مشترك بينى وبين اخى الباحث عن الحقيقه ان شاء الله يعجبكم

Saturday, November 3, 2007

مستشفى الميرى ...الموت قادم لا محاله

السلام عليكم ورحمه الله وبركاته
________________
ترددت كتير اوى قبل ما اكتب التدوينه دى
حتى العنوان لغايه الان مش عارفه اختاره
بس كان لازم اكتبها
اصلى فاض بيا الكيل بصراحه
ببساطه نفسى اعرف الحل؟؟؟؟؟؟؟؟؟؟؟؟؟؟؟؟
وببساطه هتسالونى ايه هى المشكله يا بنتى اصلا عشان نقولك حل!!!!!!!!!!!!!!!!!!!!!!!!!ليكم حق تستغربونى
المشكله ببساطه
************************
العجز
*************************
ايوه العجز
ارواح تزهق امام عينك وانت واقف تتفرج وتعبير بسيط بوشك انك ال يعنى حزين ومتدايق
لحد امتى بقى هفضل عاجزه واتفرج وبس
معلش توهتكم معايا
المساله متعلقه بعجز مستشفياتنا
وخاصه مستشفى الميرى بالاسكندريه
******************************
عارفين الناس مسمينها ايه
مستشفى الموت
لازم الى يروح يموت
طيب هو الى بيروح بيموت ليه يا جماعه؟؟؟؟؟؟؟؟؟؟؟؟؟
ناس تقولك اهمال
وتقريبا معظم الناس بتقول كده
انا من وسط تجربتى الشخصيه هناك
بقولكم بعلو صوتى
مش الاهمال والله السبب
الاسباب كتيره عشان نكون ناصفين وعادلين
الاهمال ده جزء بسيط جدا جدا
تعالوا على البلاوى الاكتر
مفيش اصلا اماكن كافيه للعيانين
مفيش اصلا ادويه متوفره لعلاجهم
مفيش اصلا اجهزه عدله شغاله بما يرضى الله
المكان كله على بعضه غير ادمى للناس الى بصحتها
فما بالكم بالناس الى فقدت صحتها
مش بس كده الاسباب
لا
جهل الناس نفسهم
بيجوا فى اوقات متاخره جدا جدا من علاجهم
من الاخر هما لسه فاكرين يجوا
وطبعا لو دققت هتلاقى سبب تاخرهم فى طلب العلاج
ياما عن جهل
ياما نتيجه فقر
العين بصيره والايد قصيره
اذا
وصلت فى نهايه تفكيرى الى خلانى بجد افقد جزء من صوابى
مشكله مستشفى الميرى مشكله بلد بحالها
مشكله مصر كلها
لو روحت اى حته فى مصر هتلاقى نفس الاسباب مسببه مشكله تانيه خالص
خاصه باى مجال تانى
للاسف حال البلد كل يوم فى النازل
واحنا بنعمل ايه
ولا حاجه
ياما ناس مكبره دماغها اصلا
ياما ناس تتصعب اوى وتقول يا حرام حسبنا الله ونعم الوكيل
ياما بقى الى يعنى ربنا فتح عليه يجى فى مدونته ويكتب له كلمتين زيى كده مثلا
وخلاص
خلصت
لا فى حل ولا فى حاجه
ماشى وبعدين يعنى
انا بصراحه قررت اسافر
ماهو مفيش حل تانى ادامى
هغير الكون مثلا
الكون الى هو مصر تحديدا
محدش يقولى لنبدا بانفسنا
ماشى منا بدات
بس يعنى وصلت لايه
طحنت نفسى وعملت كل الى اقدر عليه
بس فى الاخر يعنى حصل ايه
ولا حاجه
جايه تلبيغه بعد الفجر
ممرضه بتتصل بالطوارئ تحت
لو سمحتى عايزين دكتوره تيجى بس تتاكد لنا ان الراجل مات
اطلعى يا سمسم معلش شوفى الراجل
طبعا الدكتوره بتقولها لى وهى بتدلعنى
طبعا منا مش عارفه افتح عينى ولا اقف على رجلى من تعب طول الليل
طبيعى تقولها بالطريقه دى عشان ارضى اطلع
طلعت سمسم الراجل الحمد لله مات
يلا اهو فضى مكان لغيره
عشان بردوا يجى يموت مفيش مشكله
بصوا انا مش يائسه
ولا متنرفزه
ولا زهقانه
ولا حاجه خالص
انا بس اصلى بكبر المواضيع
بعمل من الحبه قبه على راى الناس
معلش متاخدوش فى بالكم
اهو شويه كلام طابقين على نفسى وقولتهم
المملكه هنا اسمها طريق الامل
وللاسف ده كان املى وانا بصممها واعملها
بس سامحونى
انا والله اول لما بلاقى شعاع امل باجى واكتب عنه
بس لو بصيتوا لاشعه الامل الى كتبتها مقارنه بالموضوعات التانيه
هتبقى قليله اوى
بس غصب عنى
اصل مينفعش اضحك على نفسى وعليكم
كفايه كده بجد مش لاقيه كلام ولا عايزه اقول كلمه تانيه كفايه احسن